Հայաստանի շախմատի տղամարդկանց հավաքականը երկրորդ անգամ անընդմեջ դարձավ օլիմպիական չեմպիոն շախմատի 38-րդ օլիմպիադայում, որը կայացավ Դրեզդենում: Եզրափակիչ 11-րդ տուրում հայ շախմատիստները, որոնց ոգեւորում էր անձամբ ՀՀ նախագահ Սերժ սարգսյանը, հաստատուն հաղթանակ տարան Չինաստանի հավաքականի նկատմամբ 2,5:1,5 հաշվով: Առաջին եւ երկրորդ խաղատախտակներին խաղացող Լեվոն Արոնյանն ու Վլադիմիր հակոբյանը ոչ ոքի ավարտեցին իրենց խաղերը, իսկ հաղթական միավորը վաստակեց երրորդ խաղատախտակին խաղացող Տիգրան Պետրոսյանը, որը ստիպեց մրցակցին հանձնվել մինչ խաղի ավարտը: Ոչ ոքի ավարտեց իր խաղը նաեւ Գաբրիել Սարգսյանը: Այսպիսով, Հայաստանի հավաքականը վաստակելով 19 միավոր, իրենից ցածր հորիզոնականներում գտնվող հավաքականներին գավաթի համար պայքարելու ոչ մի շանս չթողեց: Հայաստանի հավաքականը, որը 10-րդ տուրից հետո գտնվում էր առաջին հորիզոնականում, Ուկրաինայի պարտության դեպքում, որը վերջին տուրում խաղալու էր ԱՄՆ-ի հավաքականի հետ, նույնիսկ ոչ ոքի խաղալով Չինաստանի հետ, կվաստակեր ոսկե մեդալները: Ի դեպ` Ուկրանիան պարտվեց 11-րդ տուրում: Այսպիսով հայաստանը կրկնեց երկամյա անցյալի հաջողությունը, երբ 2006 թվականին Թուրինում դարձավ շախմատի 37-րդ օլիմիադայի գավաթակիրը: Թուրինյան խաղերի Հայաստանի հավաքականի կազմում փայլում էր 26 ամյա շախմատիստ Կարեն Ասրյանը, որն այս տարի վաղաժամ հեռացավ կյանքից: Հայաստանի կանանց հավաքականը Դրեզդենի օլիմպիադայում զբաղեցրեց 6-րդ հորիզոնականը 16 միավորով: Իսկ կանանց մրցաշարի հաղթող դարձավ Վրաստանի հավաքականը 18 միավորով: