2005թ. հոկտեմբերին ՀՀ կառավարության որոշմամբ Կարեն Դեմիրճյանի անվան մարզահամերգային համալիրը վաճառվել էր ռուսական ԲԱՄՕ ընկերությանը, որը պարտավորվել էր երեք տարվա ընթացքում շուրջ 15 մլն դոլար ներդնել, ինչպես նաեւ պահպանել կառույցի անվանումը եւ ֆունկցիոնալ նշանակությունը: Սթ. հոկտեմբերի 31-ին այն շահագործման հանձնվեց: Ներդրված գումարները նախատեսվածից մոտ երեք անգամ ավելին են եղել` շուրջ 42 մլն դոլար. Շենքը հիմնովին վերանորոգվել է, վերկանգնվել է կտուրը, նորացվել են բոլոր ինժեներային համակարգերը` տաք եւ սառը ջրի, ջեռուցման ու կոյուղու համակարգերը: Վերանորոգվել են համալիրի մեծ եւ փոքր դահլիճները, որոնք համապատասխանաբար կարող են տեղավորել 8000 եւ 2200 հանդիսատես: Երկու դահլիճներում էլ տեղադրվել են նորագույն տեխնոլոգիաներով լուսային եւ ձայնային սարքավորումներ: Մարզահամերգային համալիրում այսուհետ գործելու է նաեւ սառցադաշտ. բացվելու են հոկեյի եւ գեղասահքի դպրոցներ: Բացի «սառցային» մարզաձեւերից շենքում գործելու են ֆուտբոլի եւ վոլեյբոլի համար նախատեսված սրահներն ու ֆիթնես ակումբը: Շուտով կկառուցվեն նաեւ նոր ավտոտնակներ: