Հնդկական IBM լաբորատորիայի ինժեներները սկսել են Spoken Web համակարգի թեստավորման գործընթացը: Այդ համակարգը ինտերնետը հասանելի կդարձնի այն մարդկանց համար, ովքեր չեն կարող կարդալ ու գրել, ինչպես նաեւ նրանց համար, ովքեր ընդհանրապես զրկված են ինտերնետ կապից: Spoken Web-ի հիմքում ընկած են VoiceXML եւ HSTP (Hyper Speech Transfer Protocol) տեխնոլոգիաները, որոնք թույլ են տալիս ստեղծել վեբ-ի անալոգը հեռախոսում: Spoken Web-ի միջոցով օգտագործողը մուտք է կատարում հատուկ ձայնային կայքեր, որոնցից յուրաքանչյուրը ունի իր հասցեն: Սովորական կայքերի նմանությամբ, սրանք էլ ունեն հասցեագրություններ (link) դեպի այլ ռեսուրսներ: Այս ցանցում աշխատել կարելի կամ ձայնային հրամանների կամ էլ հեռախոսի կոճակների օգնությամբ: Ձայնային վեբի մուտքը կատարվում է հատուկ հեռախոսահամարի միջոցով: Այժմ, IBM-ը` հնդկական կապի օպերատորների համագործակցությամբ, թողարկում է Spoken Web-ի առաջին նախագծերը: