Արեգակնային համակարգի ամենափոքր մոլորակն ավելի է փոքրացել: Այդ մասին են վկայում ՆԱՍԱ-ի Messenger տիեզերանավից ստացված տվյալները: Messenger-ը անցել է Մերկուրիի մոտով այս տարվա հունվարին: Նրանից ստացված ինֆորմացիայից պարզվել է, որ այդ մոլորակի տրամագիծը փոքրացել է գրեթե 1.5 կիլոմետրով: Գիտնականները սա բացատրում են մոլորակի միջուկի հետզհետե սառչումով: Միջուկի սառեցման հետ միաժամանակ` Մերկուրին ուժեղացնում է իր մագնիսական դաշտը: Գիտնականներն այս խնդիրը վաղուց են քննարկում: - Մոլորակի միջուկի սառեցման պատճառով նրա մագնիսական դաշտն ուժեղանալուց բացի, նաեւ փոքրանում են նրա չափսերը,- ասել է Վաշինգթոնի Կառնեգի ինստիտուտի աշխատակից Շոն Սալամոնը,- իսկ Messenger տիեզերանավից ստացված տվյալները ցույց են տալիս, որ Մերկուրին փոքրանցել է 1/3-ով ավելի, քան մենք սպասում էինք:
