Այդ օրն իսպանաբնակ հայերի համար իսկական տոն էր: ՙԿոլիզեում՚ թատրոնի շենքը լցվել էր հայկական շնչով, հայ ժպիտով ու ծիծաղով, հայկական ռիթմերով: Թատրոնի դահլիճը հմայված դիտում էր Իսպանիայի Հայորդիների առնական ու գեղեցիկ Քոչարին: Մարտի 22-ին Իսպանիայի մայրաքաղաք Մադրիդում կայացավ հայ սիրված աստղեր Հասմիկ Կարապետյանի ու Արսեն Գրիգորյանի համերգային երեկոն, որն անցկացվեց քաղաքի ՙԿոլիզեում՚ թատրոնի շենքում: Այս աննախադեպ համերգի նախաձեռնողը Հայ-Իսպանական ՙՀոգիս՚ ասոցիացիայի նախագահ Վահագն Հայրապետյանն է: Նա ոչինչ չէր խնայել որպեսզի Իսպանիայի Թագավորությունում բնակվող հայերին նվիրի այդ չքնաղ համերգային երեկոն, որպեսզի իսպանահայերի համար այդ օրը տոն դառնա: Հասմիկի ու Արսենի համար էլ էր սա առանձնահատուկ հրավեր, քանի որ նրանք հայ երգիչներից առաջինն էին, որոնք ելույթ էին ունենում Իսպանիա Թագավորությունում: Մի քանի ժամ տեւողությամբ նրանց կենդանի հնչողությամբ ելույթը հայրենիքի ջերմությամբ լցրեց մեծ կարոտ ապրող հայորդիների սրտերը: Այնպիսի զգացողություն էր կարծես` այդ օրը Իսպանիայում հայկական արեւածագ էր եղել, կարծես` այդ օրն արեգակը դուրս էր եկել Մասիս սարի ետեւից: Կայացավ նաեւ երգի պրեմիերա: Արսեն Գրիգորյանի ՙՀայաստան՚ երգը` հայկական գործիքավորումով ու շնչով, կամուրջ ստեղծեց Իսպանիայի հայ հանդիսատեսի ու Հայ Հողի միջեւ: Այդ մի քանի րոպեները անմոռանալի դարձան թե’ դահլիճում գտնվող հայերի, թե’ ՙԿոլիզեումի՚ համար: Թատրոնի դահլիճը հմայված դիտում էր շուրջպար բռնած Իսպանիայի Հայորդիների առնական ու գեղեցիկ Քոչարին: Երեկոյին մասնակցում էր նաեւ Իսպանիայում բնակվող հայ տաղանդավոր երգիչ Արթուր Աբգարը, որն ի պատիվ մեզ բոլորիս այս տարի ՙԵվրոտեսիլ 2008՚-ի Իսպանիայի ուղեգրի թեկնածուներից էր: Այս գեղեցիկ միջոցառման վերջում Հասմիկ Կարապետյանը մեծ հուզմունքով խորին շնորհակալություն հայտնեց հայ հանդիսատեսին` իր ջերմ ու անկեղծ ընդունելության համար, իսկ Արսեն Գրիգորյանը վստահաբար հույս հայտնեց, որ կրկին կգա իր ժողովրդական երգերով լցնելու այն դատարկությունը, որը կուտակվել է հայրենիքի կարոտ ապրող հայի սրտում: Վերջին տեսարանը, որին ականատես եղավ ՙԿոլիզեումը՚... Երջանկությունից արցունքոտված փայլող աչքեր, մեծ գոհունակություն ու բավականություն արտահայտող հայեցի ժպիտներ, կարոտի հագուրդից բխող բուռն ծափահարությունների տեղատարափ: Կաթիլի խմբագրությունը Իսպանիայի հայերի անունից խորին շնորհակալություն է հայտնում Հոգիս ասոցիացիայի նախագահ Վահագն Հայրապետյանին, կազմակերպիչներին, Արթուր Աբգարին եւ Հայաստանից մեկնած աստղերին:
