Հանցագործության առաջին հետեւանքներն ի հայտ եկան Չինաստանում: Թունավոր քիմիկատներ հայտնաբերվեցին մանկական սննդի մեջ: Այդ սննդից տուժած երեխաների թիվը հասավ շուրջ 53000-ի: Մելամին տեսակի քիմիկատ էր հայտնաբերվել 100-ից ավելի ընկերությունների արտադրանքի շուրջ 20%-ում: Մելամինը օգտագործվում է քիմիական արդյունաբերությունում հրակայուն մակերեւույթներ ստանալու համար: Այդ նյութի չափից ավելի մեծ խտությունը մարդու օրգանիզմում առաջացնում է քարեր երիկամներում եւ միզապարկում: Կարծիքներ հնչեցին, որ արտադրողները այդ նյութը խառնել են մանկական սննդին` նրանում սպիտակուցի քանակի ցուցանիշի բարձրացման համար: Այդպես է եղել իրականում, թե ոչ դեռ պարզ չէ: Սակայն մի բան պարզ է. հանցագործությունը ծրագրողները նույնիսկ պատկերացում չեն ունեցել այն մասին, թե որքան հեռու կգնան թունավորված կաթի փոշու հետեւանքները: Չինաստանում կաթի փոշու թունավորման մասին սկանդալային տեղեկատվություններին շատ արագ հաջորդեցին տեղեկատվություններ այն մասին, որ թունավորված արտադրանք է հայտնաբերվել ոչ միայն Չինաստանում: Ռուսաստան: Կեմերովոյի շրջան: Մելամինի պարունակություն է հայտնաբերվել «Золотое молоко» չինական ապրանքանիշի արտադրանքի մեջ, որն ըստ նախնական տվյալների Կեմերովո է եկել Տոմսկից, որտեղ 1 տոննա կասկածելի կաթի փոշի է եղել: Ռուսաստան: Խաբարովսկ: Առգրավվել է 1,7 տոննա մելամինի պարունակությամբ կաթի փոշի: Ռուսաստան: Կրասնոյարսկ: Առգրավվել է 110 տուփ «Золотое молоко» ապրանքանիշի կաթի փոշի` մելամինի պարունակությամբ: Հարավային Կորեա: Վաճառքի կետերում մելամինի պարունակություն է հայտնաբերվել են Mars եւ Nestle շոկոլադային ապրանքանիշերի արտադրանքում: Սրանք թունավորված ապրանքատեսականու հայտնաբերման դեպքերի չնչին մասն են միայն: Պարզվել է, որ թունավոր նյութը հայտնաբերվել է ավելի քան 20 տեսակի արտադանքում` այդ թվում չոր եւ հեղուկ կաթեր, շոկոլադներ, սուրճեր, տարբեր տեսակի սոուսներ, յոգուրտներ, պաղպաղակներ, պանիրներ, կաթնային եւ շոկոլադե կոնֆետներ: Ցավալին այն է, որ թունավորված ապրանքատեսակնիներ զգալի մասն արդեն հասել է վաճառակետեր: Շատ երկրների առողջապահության նախարարություններ արգելել են չինական շուրջ 1000 ապրանքանիշերի արտադրանքի վաճառքը` այդ թվում Mars, Snickers, Kit Kat, M&M's, Nestle: